Eldri færslur eftir merkjum fyrir chocolate

Eplafranskar með saltkaramellusósu

Hæ! Ég var að fara í gegnum gamlar myndir í tölvunni minni um daginn og fann þá myndir sem ég tók fyrir næstum því 2 árum af eplafrönskum með saltkaramellusósu sem ég gerði. Ég var búin að steingleyma þeim, sem mér finnst mjög skrítið því þær eru hrikalega góðar! Ég ætla að deila uppskriftinni af þeim með ykkur í dag!

Eplafranskar með saltkaramellusósu
Skrifa umsögn
Prenta
Eplafranskar
  1. Smjördeig
  2. 40 gr smjör
  3. 2 stór græn epli
  4. 2-3 msk púðursykur
  5. Dass af kanilsykri
  6. 100 grömm suðusúkkulaði
Karamellusósan
  1. 1 poki af rjóma-karamellukúlum frá Nóa
  2. 2-4 msk rjómi
  3. Dass af salti
Eplafranskar
  1. Smjörið brætt á pönnunni og eplin sett út í. Þau eru steikt þar til þau fara að mýkjast.
  2. Púðursykrinum er síðan bætt við og hann bræddur saman við.
  3. Dass af kanilsykri næst bætt við, sirka 1-2 matskeiðar.
  4. Að lokum, þegar eplin eru orðin mjúk og hráefnin hafa blandast vel saman, er blandan látin standa í nokkrar mínútur áður en söxuðu suðusúkkulaði er bætt út í. Hrært saman þar til súkkulaðið er að mestu leiti bráðnað.
  5. Fletjið smjördeigið (2 plötur) út eins mikið og þið getið. Setjið fyllinguna á hálft smjördeigið og „lokið“ því svo.
  6. Skerið í ræmur, ca 5 sm á lengd og 1 cm á breidd. Notið gaffal til að þrýsta á hliðarnar til að loka eins og hægt er.
  7. Pískið egg og penslið á eplafranskarnar.
  8. Bakið við 180°C þar til eplafranskarnar verða fallega brúnar á litinn.
Karamellusósan
  1. Bræðið karamellukúlurnar á lágum hita. Passið að þær brenni ekki við.
  2. Bætið rjómanum út í þegar kúlurnar eru alveg bráðnaðar og hrærið vel. Áferðin á kúlunum breytist þegar rjómanum er blandað við.
  3. Að lokum bætið þið saltinu við. Smakkið til.
BELLE | Allt milli himins og jarðar http://www.belle.is/

-Heiðrún

 

Súkkulaðifyllt appelsínubrauð

Jæja þá er komið að næstu uppskrift! Mig langar að deila með ykkur uppskrift af æðislegu súkkulaðifylltu appelsínubrauði sem sæmir sér vel á hvaða veisluborði sem! Brauðið er ótrúlega fallegt og þó svo að það virðist flókið þá er alls ekki erfitt að skella í það! Ég mæli sannarlega með þessari uppskrift 🙂 Þið getið breytt súkkulaðifyllingunni ef þið viljið leika ykkur aðeins með uppskriftina og sett þá fyllingu sem þið viljið, ég ætla til dæmis næst að prufa að nota Nutella, það hlýtur að vera mjög gott.

Súkkulaðifyllt appelsínubrauð
Skrifa umsögn
Prenta
Brauðið
  1. 1 bréf af geri
  2. 1/3 bolli + 2 matskeiðar appelsínusafi
  3. Rifin börkur af einni appelsínu
  4. 1/3 bolli Olífuolía
  5. ½ bolli fljótandi hunang
  6. 2 egg + 1 egg til að pensla með
  7. 1 ½ tsk salt
  8. 4 og 1/4 bolli hveiti
Súkkulaðifylling
  1. 130 gr suðusúkkulaði
  2. 110 gr smjör
  3. 1/3 bolli sykur
  4. 2 matskeiðar kakó
Aðferð
  1. Hitið appelsínusafann smá í örbylgjuofni þannig að hann sé við ca. líkamshita. Hellið gerinu út í safann og látið standa í smá tíma eða þar til gerið er uppleyst
  2. Blandið síðan saman við hunangi , appelsínuberki, olíu og eggjum.
  3. Í annarri skál blandið þið saman salti og hveiti.
  4. Bætið vökvanum útí og hnoðið saman. Látið standa við herbergishita í 1 klst og setjið svo í ísskáp yfir nótt, má alveg vera í 8-24 klst. Daginn eftir takið deigið út og látið það ná stofuhita (getur tekið 2-3 klst).
  5. Búið til fyllinguna. Bræðið saman smjörið og súkkulaðið og blandið síðan sykrinum og kakóinu við. Geymið við stofuhita meðan þið gerið deigið tilbúið
  6. Þegar deigið er tilbúið skiptið því í tvo hluta og fletjið út hvern fyrir sig, berið súkkulaði á og rúllið upp í rúllu. Gerið eins við hinn hlutann.
  7. Skerið hlutana í tvo bita þannig að þú sért með 4 hluta til að flétta.
  8. Fléttið brauðið, setjið á smjörpappír og leggið viskustykki yfir. Látið lyfta sér í um það bil 1 klst. Penslið með eggi og bakið við 190 gráður í 35-45 mínutur. Ef brauðið dökknar of fljótt er gott að leggja álpappír yfir restina af tímanum.
BELLE | Allt milli himins og jarðar http://www.belle.is/

-Heiðrún 

Dásamleg eftirréttarkaka

Jæja ekki nema þrír mánuðir frá síðustu færslu! Afsakið þetta bloggleysi, stundum þarf maður bara smá pásu. Ég skal alveg viðurkenna það að ég var eiginlega komin með smá leið á því að vera endalaust að baka og elda og taka myndir fyrir síðuna. Þessi bloggpása var einmitt það sem ég þurfti því eins og staðan er í dag er ég full af hugmyndum og ætla að reyna að vera dugleg næstu vikur að koma þeim í framkvæmd, baka eitthvað skemmtileg fyrir jólin og þess háttar. Ég ætla að byrja á því að deila með ykkur uppskrift af ljúffengri eftirréttarköku sem gæti verið tilvalin um jólin! Ég hef prófað kökuna bæði frosna (ískaka) og kalda (geymd í ísskáp). Persónulega fannst mér hún betri frosin og mæli því með henni þannig.

Ísterta
Skrifa umsögn
Prenta
Marengsbotninn
  1. 4 eggjahvítur
  2. 250 gr sykur
  3. 1 tsk eddik
  4. 2 tsk Maizena
  5. 4 msk kakó
Ísinn
  1. 600 ml rjómi
  2. 1 dós condensed sykruð mjólk (400g) (sæt mjólk, sjá á mynd hér að ofan)
  3. Korn úr 1x vanillustöng
  4. 3 msk kakó
  5. 100 gr súkkulaðidropar (konsum) - saxaðir
  6. 50 gr súkkulaðidropar sem skraut - saxaðir
Marengsbotninn
  1. Hitið ofninn í 150 °C.
  2. Þekkið smelluform með smjörpappír, ca 20 cm breitt. Látið smjörpappírinn ná uppá hliðarnar alveg.
  3. Stífþeytið eggjahvítur og bætið sykri smátt og smátt í meðan þið hrærið.
  4. Bætið við Ediki og maizena.
  5. Hellið kakó í gegnum sigti í stífþeyttar eggjahvíturnar og hrærið saman með sleif, blandið vel.
  6. Setjið marensinn í formið og bakið í 1 klst.
  7. Látið kóna alveg í forminu þegar botninn er tilbúinn. Þegar marensinn er orðin kaldur þá byrjið þið á ísnum.
Ísinn
  1. Þeytið saman rjómann og mjólkina (stundum betra að þeyta rjómann fyrst til hálfs og blanda svo mjólkinni við) þar til orðið stíft.
  2. Hrærið fræinn úr vanillustönginni við blönduna.
  3. Skiptið ísnum í tvo hluta.
  4. Hrærið súkkulaðidropana við annan hlutann og sigtað kakóið í hinn hlutann.
  5. Setjið hvíta hlutann fyrst á marensinn og síðan þann brúna varlega ofan á.
  6. Hrærið aðeins í ísblöndunum með prjóni til að blanda þeim saman, sjá mynd hér að ofan.
  7. Setjið plast yfir kökuna og frystið í minnst 8 klst eða lengur.
Annað
  1. Mjög gott að bera fram með einhversskonar sósu, ég hef til dæmis búið piparmintusósu (uppskrift kemur seinna)
BELLE | Allt milli himins og jarðar http://www.belle.is/

-Heiðrún

Bollakökur með súkkulaði-eplafyllingu

 

Jæja langt síðan ég hef skellt inn uppskrift! Afsakið það, ég er bara búin að vera að njóta þess að vera í sumarfríi og hef eiginlega voðalega lítið hugsað um bakstur eða eldamennsku síðustu vikur. Ég er búin að fara í ferðalög innanlands og svo skellti ég mér líka til San Francisco í nokkra daga í byrjun júlí. San Francisco er æðisleg borg! Mæli svo sannarlega með henni fyrir þá sem eru í ferðahug. Það kom mér samt svolítið á óvart hvað það var kalt þar, sérstaklega á kvöldin. Ég pakkaði engum hlýjum fötum þar sem ég gerði ráð fyrir að það væri alltaf gott veður í Californiu, sérstaklega á sumrin, en endaði á því að þurfa kaupa mér jakka til að lifa kvöldin af. En eins og ég sagði, þetta er æðisleg borg og svo margt að sjá, ég get ekki beðið eftir að heimsækja borgina aftur seinna! 🙂 

En að næstu uppskrift. Eins og ég skrifaði hér fyrir ofan þá hef ég lítið nennt að hugsa um bakstur síðustu vikur. Ég fer samt vonandi að detta í gírinn bráðum en i dag ætla ég að deila með ykkur eldri uppskrift af æðislegum bollakökum fylltum með eplum og súkkulaði. Ég bakaði þessar kökur fyrst fyrir nokkrum árum og tók þá myndirnar, þess vegna eru gæðin í myndum ekki alveg þau bestu. Þrátt fyrir það ákvað ég samt að deila þeim með ykkur í dag. Ég er mikill bollaköku aðdáandi og ég verð að segja að þetta eru klárlega einar bestu bollakökur sem ég hef smakkað. Uppskriftin kann að hljóma flókin en ég lofa, það er alls ekki erfitt að baka þær! Vona að þið njótið jafn vel og ég 🙂 

Bollakökur með súkkulaði-eplafyllingu og Pipp karamellusósu
Skrifa umsögn
Prenta
Bollakökur
  1. 2 bollar hveiti
  2. 1 2/3 bolli sykur
  3. 1 ¼ tsk matarsódi
  4. 1 ¼ tsk salt
  5. 1 bolli mjólk
  6. 125 grömm smjörlíki – lint
  7. 1 tsk vanilludropar
  8. 3 egg
Súkkulaði-eplafylling
  1. 40 gr smjör
  2. 2 stór græn epli
  3. 2-3 msk púðursykur
  4. Dass af kanilsykri
  5. 100 grömm suðusúkkulaði
Karamellusósa
  1. 100 grömm Pipp með karamellufyllingu
  2. 2-3 msk rjómi
Bollakökur
  1. Öllum hráefnum blandað vel saman.
Súkkulaði-eplafylling
  1. Smjörið brætt á pönnunni og eplin sett út í. Þau eru steikt þar til þau fara að mýkjast.
  2. Púðursykrinum er síðan bætt við og hann bræddur saman við.
  3. Dass af kanilsykri næst bætt við, mæli með sirka 2-3 matskeiðum.
  4. Að lokum, þegar eplin eru orðin mjúk og hráefnin hafa blandast saman, er blandan látin standa í nokkrar mínútur áður en söxuðu suðusúkkulaði er bætt út í. Hrært saman þar til súkkulaðið er að mestu leiti bráðnað.
Að lokum
  1. Bollakökuformin eru fyllt með deigi til hálfs. Ein matskeið af fylllingu er síðan sett ofan á deigið og að lokum er fyllt upp í formið með meira deigi.
  2. Kökurnar fara inn í 180 gráðu heitan ofn og eru bakaðar í um það bil 20 mínútur.
Karamellusósa
  1. Allt brætt saman í potti
Annað
  1. Borið fram með þeyttum rjóma og karamellusósunni
BELLE | Allt milli himins og jarðar http://www.belle.is/

-Heiðrún

 

Formkaka með súkkulaðibitum

Áður en ég birti næstu uppskrift þá langar mig að þakka ykkur kærlega fyrir frábærar viðtökur á kökunni með hvíta fluffy kreminu sem ég birti í síðustu viku. Mig grunaði ekki að uppskriftin yrði svona vinsæl en hún er án efa ein langvinsælasta uppskrift sem ég hef birt hér á Belle.

Næst langar mig að deila með ykkur uppskrift af klassískri formköku með súkkulaðibitum. Ótrúlega góð kak, sérstaklega þegar hún er volg.

Formkaka með súkkulaðibitum
Skrifa umsögn
Prenta
Hráefni
  1. 200 gr smjörlíki - við stofuhita
  2. 3 dl sykur
  3. 3 egg
  4. 6 og 1/2 dl hveiti
  5. 2 og 1/4 tsk lyftiduft
  6. 2 tsk vanilludropar
  7. 1 og 1/4 dl mjólk
  8. 1 og 1/2 dl saxað suðusúkkulaði (eða súkkulaðidropar) (ég bæti stundum smá súkkulaði við, finnst betra að hafa meira súkkulaði 🙂
Aðferð
  1. Hrærið smjörlíki og sykri saman á hæsta hraða í ca 5-6 mínútur eða þar til blandan verður létt og ljósgul.
  2. Bætið eggjunum í, einu í senn og hrærið vel á milli.
  3. Mælið öll önnur hráefni í skálina og hrærið saman með sleikju.
  4. Skiptið í 2 aflöng lítil kökuform. Passið að deigið klístrist ekki upp með hliðunum í forminu.
  5. Bakið í miðjum ofni í 30-35 mínútur við 180°C eða þar til prjónn kemur hreinn út þegar honum er stungið í miðja kökuna.
BELLE | Allt milli himins og jarðar http://www.belle.is/

-Heiðrún

Æðisleg skúffukaka

Góð skúffukaka klikkar sjaldan! Það er lítið sem er meira kósý en að skella í eina skúffuköku þegar það er kalt úti og hjúfra sig svo upp í sófa og gæða sér á sneið 😉 Hérna kemur uppskrift skúffuköku sem er í uppáhaldi hjá mér. Mæli með því að bera hana fram með rjóma.

IMG_5780

IMG_5784

IMG_5793

Æðisleg skúffukaka
Skrifa umsögn
Prenta
Skúffukaka
  1. 200 gr hveiti
  2. 280 gr sykur
  3. 1 og ¼ tsk matarsódi
  4. 1 tsk salt
  5. 50 gr kakó
  6. 125 gr smjörlíki - lint
  7. 3 egg
  8. 1 tsk vanilludropar
  9. 100 ml mjólk
Krem
  1. 130 gr smjör - lint
  2. 1 egg
  3. 250 gr flórsykur
  4. 1 tsk vanilludropar
  5. 1 msk kakó
  6. 100 gr suðusúkkulaði
  7. 3-4 msk rjómi
  8. Kókos
Skúffukaka
  1. Hrærið saman sykri, smjörlíki, vanilludropum og eggjum.
  2. Sigtið hveiti, matarsóda, salt og kakó saman og blandið við.
  3. Hellið mjólkinni út í og hrærið allt saman.
  4. Kakan er bökuð við 180 gráður í 25-30 mín eða þar til þú getur stungið prjón í hana og hann kemur hreinn út.
Krem
  1. Hrærið smjöri og eggi saman þar til blandan verður alveg mjúk.
  2. Hrærið flórsykrinum við blönduna.
  3. Bætið kakói og vanilludropum við og hrærið vel.
  4. Bræðið suðusúkkulaðið yfir vatnsbaði.
  5. Bætið súkkulaðinu við kremblönduna og hrærið vel.
  6. Að lokum bætið þið 3-4 matskeiðum af rjóma (ekki þeyttum) við kremið og hrærið.
  7. Setjið kremið á kökuna og endið á því að strá kókos yfir.
BELLE | Allt milli himins og jarðar http://www.belle.is/

-Heiðrún

 

Karamellubitar

Næsta uppskrift sem ég ætla að deila er í miklu uppáhaldi hjá mér. Þessir karamellubitar eru svo góðir að þeir bráðna í munninum! Tilvalið að skella í þessa bita fyrir til dæmis fermingar sem eru á næsta leiti. Uppskriftin er einföld og fljótleg og ég lofa að þessir karamellubitar slá í gegn hjá hverjum sem þá smakka! Ég nota sæta mjólk (condensed milk) í  karamelluna. Ég hef alltaf fengið þannig í Kosti. Hér að neðan sjáið þið mynd af sætri mjólk. Njótið! 🙂IMG_1954

IMG_5697

IMG_5704

IMG_5710

IMG_5713

IMG_5715

IMG_5724

IMG_5727

IMG_5729

IMG_5746

IMG_5749

IMG_5751

IMG_5767

IMG_5769

IMG_5771

Karamellubitar
Skrifa umsögn
Prenta
Kexbotn
  1. 125 gr smjör – lint
  2. 50 gr sykur
  3. 175 gr hveiti
  4. Smá salt
Karamellan
  1. 200 gr sæt mjólk (Condensed milk)
  2. 125 gr smjör
  3. 125 gr sykur
  4. 2 matskeiðar síróp
  5. 1 teskeið vanilludropar
  6. Smá salt
Súkkulaðihjúpur
  1. 200 gr hjúpsúkkulaði – ljóst
Kexbotn
  1. Hitið ofninn í 170°C.
  2. Hrærið saman smjörinu (við stofuhita) og sykrinum þar til blandan verður létt og „fluffy“.
  3. Bætið hveitinu og saltinu við og hrærið vel þar til blandan verður mylsnukennd. Sjá mynd hér að ofan.
  4. Setjið smjörpappír í form (ég nota stærð 18x28 cm) og hellið deiginu á smjörpappírinn.
  5. Notið fingurna til að þrýsta deiginu saman í formið.
  6. Stingið með gaffli í deigið eins og sést á myndinni hér að ofan til að það lyfti sér ekki eins mikið.
  7. Bakið í 15-20 minútur eða þar til deigið verður gullinbrúnt.
  8. Látið kólna á meðan þið búið til karamelluna.
Karamellan
  1. Setjið öll hráefnin í pott og hitið á miðlungshita.
  2. Hrærið vel í blöndunni þar til öll hráefnin hafa blandast saman.
  3. Það er mikilvægt að hræra í blöndunni á meðan karamellan er að verða til. Hún er mjög fljót að brenna við í pottinum og þegar það gerist er hún ónýt.
  4. Þegar karamellan hefur breytt um lit og er orðin aðeins dekkri og þykkari er hún tilbúin.
  5. Hellið karamellunni yfir kexbotninn.
Súkkulaðihjúpur
  1. Hitið súkkulaðið yfir vatnsbaði.
  2. Þegar súkkulaðið hefur bráðnað hellið því þá yfir karamelluna. Dreifið úr því með skeið.
  3. Leyfið súkkulaðinu að harðna áður en þið skerið í bita.
Tekið úr Kitchen Mason
Tekið úr Kitchen Mason
BELLE | Allt milli himins og jarðar http://www.belle.is/

-Heiðrún

Heimsins bestu súkkulaðibitakökur

Ég held að flestir sem hafa gaman af því að baka eigi sér uppáhaldsuppskrift af súkkulaðibitakökum. Þessi uppskrift er mín uppáhalds, ég elska þessar súkkuklaðibitakökur! Stökkar að utan og mjúkar innan í, stútfullar af súkkulaði. Þær eru líka ótrúlega auðveldar og fljótlegar, tekur enga stund að skella í skammt af kökum. Mæli með! 🙂

IMG_5502

IMG_5504

IMG_5507

IMG_5516

IMG_5518

Heimsins bestu súkkulaðibitakökur
Skrifa umsögn
Prenta
Hráefni
  1. 230 gr smjör
  2. 140 gr sykur
  3. 170 gr púðursykur
  4. 1 tsk vanilludropar
  5. 2 stór egg
  6. 1 tsk matarsódi
  7. 330 gr hveiti
  8. 1 tsk salt
  9. 300-350 gr súkkulaðidropar eða saxað suðusúkkulaði
Aðferð
  1. 300-350 gr súkkulaðidropar eða saxað suðusúkkulaði
  2. Byrjið á því að hræra saman smjöri, sykri, púðursykri, vanilludropum og eggjum. Hrærið vel þar til blandan verður létt og „fluffy“.
  3. Bætið næst restinni af hráefninu við blönduna (hveitinu, matarsódanum og saltinu) og hrærið.
  4. Að lokum hrærið þið súkkulaðibitunum í blönduna.
  5. Búið til litlar kúlur úr deiginu og komið fyrir á smjörpappír á ofnplötu.
  6. Hitið ofninn á 180°C.
  7. Bakið súkkulaðibitakökurnar í 9-11 mínútur. Passið að baka þær ekki of lengi, þá verða þær harðar, þær eru alltaf betri þegar þær eru mjúkar í miðjunni 😉
BELLE | Allt milli himins og jarðar http://www.belle.is/

-Heiðrún

 

Konfekt með þrenns konar fyllingu: Hockey Pulver, saltkaramellu og piparmyntu

img_5207

Uppskriftin hefur verið uppfærð frá fyrstu birtingu

Eins og ég lofaði í síðustu viku þá ætla ég að birta fyrstu jólauppskriftina í dag. Um helgina bjó ég til þrenns konar konfekt, eitt með Huckey Pulver fyllingu, eitt með salt-karamellu fyllingu og annað með piparmyntu fyllingu. Ég hef aldrei prófað að búa til konfekt en miðað við hvað það heppnaðist vel þá verður þetta hér eftir hefð hjá mér! Klárlega eitt besta konfekt sem ég hef smakkað, sérstaklega þetta með Hockey Pulver fyllingunni, enda var það fyrst til að klárast í matarboðinu þar sem ég bauð upp á það 🙂 
Ég keypti mér mjög fín konfektform í Ikea fyrir helgi, ef ykkur vantar þannig þá held ég að þau séu ennþá til. Þið getið skoðað formin betur hér. Annars er líka hægt að nota klakaform.
Það er frekar erfitt að gefa nákvæma uppskrift af konfektinu. Með uppskriftinni hér að neðan náði ég að fylla 3 Ikea konfektform og setti mismunandi fyllingu í hvert form.  Ef þið notið öðruvísi form þá er mjög líklegt að þið þyrftuð annað hvort að minnka eða stækka uppskriftina. Sama má segja um fyllinguna sem ég notaði. Ef þið viljið bara gera konfekt með t.d. Hockey Pulver fyllingu þurfið þið líklega að stækka uppskriftina.
Ég notaði suðusúkkulaði því mér finnst það svo ótrúlega gott en þar sem það bráðnar fljótt eftir að konfektið er tekið úr ísskápnum þá er gæti verið betra að nota  hjúpsúkkulaði, það bráðnar ekki jafn hratt.
img_5173

img_5176

img_5187

img_5193

img_5198

img_5205

img_5209

15151476_10154363112162670_1812417800_n

Konfekt með þrenns konar fyllingu: Hockey Pulver, saltkaramellu og piparmyntu
Skrifa umsögn
Prenta
Konfekt
  1. 350 gr hjúpsúkkulaði eða suðusúkkulaði
Hockey Pulver fylling
  1. 50 gr smjör (Mjög lint)
  2. 60 gr flórsykur
  3. 30 gr brætt hvítt súkkulaði
  4. ½ - 1 dolla af Hockey Pulver (smakkið kremið til að finna hversu sterkt til viljið hafið það)
Salt-karamellu fylling
  1. 55 gr smjör
  2. 50 gr púðursykur
  3. 30 ml rjómi (má líka nota mjólk)
  4. Salt eftir smekk
Piparmyntufylling
  1. 50 gr flórsykur
  2. Piparmyntudropar
  3. Mjólk
Konfekt
  1. Byrjið á því að bræða 350 gr af súkkulaði yfir vatnsbaði.
  2. Þegar súkkulaðið er bráðnað fyllið þá konfektformið af súkkulaði.
  3. Þegar þið eruð búin að því hellið þá súkkulaðinu aftur í skálina. Notið sköfu eða sleif til að skafa allt aukasúkkulaði af forminu og setja það aftur í skálina.
  4. Það ætti að myndast súkkulaðiskel í konfektforminu. Passið að súkkulaðið hylji allar hliðar formsins.
  5. Setjið formin inn í ískáp og leyfið þeim að vera þar á meðan fyllingin er útbúin.
  6. Þegar fyllingin er tilbúin takið þá formin úr ísskápnum. Setjið fyllinguna sem þið ætlið að nota í sprautupoka. Sprautið fyllingunnni í konfektskelina.
  7. Takið afganginn af súkkulaðinu og fyllið upp í konfektformin.
  8. Setjið formin inn í ískáp í ca.2 klukkustundir eða þar til súkkulaðið er orðið hart.
Hockey Pulver fylling
  1. Hrærið saman smjöri og flórsykri. Það er mikilvægt að smjörið sé mjög lint.
  2. Bræðið hvíta súkkulaðið yfir vatnsbaði.
  3. Hrærið súkkulaðinu við kremið. Hrærið mjög vel.
  4. Bætið Hockey Pulver duftinu við kremið. Ég mæli með því að setja lítið í einu og smakka kremið til svo að kremið verði ekki of sterkt fyrir ykkar smekk.
Salt-karamellu fylling
  1. Setjið öll hráefnin í pott. Hitið á miðlungshita þar til blandan fer að sjóða. Verið dugleg að hræra í á meðan.
  2. Þegar suðan kemur upp lækkið þá hitann undir pottinum og leyfið blöndunni að malla í um það bil 5 mínútur eða þar til hún verður þykk. Munið að hræra vel í blöndunni á meðan.
  3. Mikilvægt að karamellan fái alveg að kólna alveg áður en hún er sett í konfektskelina.
Piparmyntufylling
  1. Hrærið saman flórsykri, piparmyntudropum og nokkrum dropum af mjólk.
  2. Passið að glassúrinn verði ekki of þunnur.
Annað
  1. Ef þið ætlið að nota suðusúkkulaði þá þarf að geyma súkkulaðið inni í ísskáp.
BELLE | Allt milli himins og jarðar http://www.belle.is/

-Heiðrún

 

Salt-karamellu súkkulaðikaka

img_5057

Ég elska að prófa nýjar uppskriftir, það er í alvöru eitt það skemmtilegasta sem ég geri! Mér finnst eitthvað svo róandi við það að dúlla mér í eldhúsinu og ég gæti auðveldlega eytt heilum dögum þar að baka eða elda! Ég prófaði þessa nýju kökuuppskrift um daginn og ég held að hún fari beint inn á topp 5 listann af bestu kökum sem ég hef bakað! Gefið ykkur góðan tíma í baksturinn, hann tekur um það bil 2 klukkutíma en er alveg þess virði.

img_5045 img_5060 img_5062 img_5076 img_5083 img_5106

Salt-karamellu súkkulaðikaka
Skrifa umsögn
Prenta
Kakan
  1. 215 gr sykur
  2. 80 gr ljós púðursykur
  3. 80 gr kakó – sigtað
  4. 200 gr hveiti
  5. 2 tsk matarsódi
  6. 1 tsk lyftiduft
  7. 1 tsk salt
  8. 3 stór egg
  9. 1 eggjarauða
  10. 1 dós (180 gr) sýrður rjómi – 18%
  11. 1/3 bolli mjólk
  12. ¾ bolli grænmetisolía (ég nota Isio olíu)
  13. 2 tsk vanilludropar
  14. 1 bolli heitt vatn
Saltkaramellan
  1. 170 gr smjör
  2. 150 gr ljós púðursykur
  3. 125 ml rjómi
  4. Salt eftir smekk
Krem
  1. 315 gr smjör –mjög lint
  2. 400 gr flórsykur
  3. 20 gr kakó
  4. 3 msk rjómi
  5. 2-3 matskeiðar saltkaramella (hún verður að vera orðin köld)
Kakan
  1. Hrærið saman sykri, púðursykri, hveiti, kakó, matarsóda, lyftidufti og salti.
  2. Í annarri skál skuluð þið hræra saman egg, eggjarauðu, sýrðum rjóma, mjólk, olíu og vanilludropum. Hrærið mjög vel.
  3. Bætið þurrefnunum úr hinni skálinni við og hrærið vel.
  4. Í lokin bætið þið heita vatninu við blönduna. Deigið ætti að verða nokkuð þunnt.
  5. Skiptið deiginu í 2 jafnstór form. Mér finnst alltaf best að setja bökunarpappír í formið svo auðveldara sé að ná kökunum úr forminu.
  6. Bakið við 180°C í 30 mínútur eða þar til hægt er að stinga tannstöngli í miðja kökuna og hann kemur hreinn út.
  7. Það er mikilvægt að kakan fái að kólna alveg áður en kremið er smurt á kökuna.
Salt-karamellan
  1. Setjið öll hráefnin í pott. Hitið á miðlungshita þar til blandan fer að sjóða. Verið dugleg að hræra í á meðan.
  2. Þegar suðan kemur upp lækkið þá hitann undir pottinum og leyfið blöndunni að malla í um það bil 5 mínútur eða þar til hún verður þykk. Munið að hræra vel í blöndunni á meðan.
  3. Mikilvægt að karamellan fái alveg að kólna áður en hún er smurð á kökuna.
Krem
  1. Byrjið á því að hræra smjörið með hrærivél í um það bil 3 mínútur eða þar til það verður alveg mjúkt og slétt.
  2. Sigtið flórsykur og kakó og hrærið saman við smjörið.
  3. Bætið við vanilludropum, rjómanum (ekki þeyttur) og salt-karamellunni sem þið eruð búin að útbúa. Hrærið öllu vel saman.
  4. Ef ykkur finnst kremið vera of þunnt bætið þá við flórsykri. Ef ykkur finnst kremið hinsvegar of þykkt bætið þá við rjóma.
Í lokin
  1. Skerið ofan af kökunni ef þess þarf til að gera hana jafnari.
  2. Munið að mikilvægt er að kakan og salt-karamellan fái alveg að kólna.
  3. Byrjið á því að smyrja hluta af kreminu á annan kökubotninn,
  4. Næst bætið þið hluta af salt-karamellunni ofan á kremið.
  5. Leggið hinn botninn ofan á.
  6. Smyrjið kökuna með restinni af kreminu.
  7. Notið afganginn af salt-karamellunni til að skreyta kökuna.
  8. Stráið sjávarsalti ofan á kökuna áður en hún er borin fram.
Annað
  1. Í kökunni er ekkert smjör né smjörlíki.
  2. Sýrði rjóminn gerir það að verkum að kakan verður sérstaklega mjúk.
BELLE | Allt milli himins og jarðar http://www.belle.is/

-Heiðrún 

 

Fylgdu okkur á


Follow