Auður

Óbarnvæn innanhústrend

Ég er sökker fyrir fallegum innanhústrendum, og legg stolt mitt í að íbúð mín sé eins pinterestvæn og hægt er, allaveganna reyni mitt besta! En það er erfitt með einn 18 mánaða strák hlaupandi eins og hvirfilvindur um. Ég vildi óska að ég gæti verið ein af þeim mömmum sem ná að láta börnin sín hlýða sér í einu og öllu og ekki snerta fínu hlutina hennar mömmu og pabba sem liggja á hillum og borðum. En það er ég ekki. Punktur. Hann hlýðir mér í mörgu og lætur eldavél og flest alla hættulega hluti vera, fæ jafnvel að hafa smá skraut á einu borði og hillum sem hann tekur stundum í en sleppir strax og mamma tekur eftir því. En eins og staðan er núna get ég ekki verið með í sumum trendum sem mér finnst svo falleg, kannski einhvern tímann en ekki alveg núna. ( allar myndirnar eru fengnar af PINTEREST )

Óbarnvæna innanhústrend 1: Fullt af fallegu smá skrauti á stofuborði, bækur staflaðar ef til vill með glervasa ofan á og nýplokkuðum ( keyptum ) smekklegum blómum ofaní. EKKI SÉNS! Brotinn glervasi, bækur á gólfi, með nokkrum rifnum síðum kannski, allt smáskraut kominn ofan í sparkbílinn hans. Jafnvel búið að smakka smá á blómunum. Já ég læt ekki á þetta reyna í bráð.

Óbarnvæna innanhústrend 2: Skraut og bækur á hillum. Allskonar skraut, skiptir engu máli hvað það er, þetta er allt mjög áhugavert fyrir lítið barn. Á eina hillusamstæðu þar sem ég var alltaf með mikið skraut á einu sinni fyrir löngu en núna er skrautið einungis efst uppi, ofan á þar sem litlar hendur komast ekki í það. Neðsta hillan er hillan hans Emils ( stráksins míns): Falleg leikföng sem mér finnst gaman að hafa frammi fyrir hann ( og mig ) viðartromma og annað viðarleikfang, plús barnabækur. Önnur hilla: samtals 5 bækur sem Mamma og pabbi eiga sem færast til af litlum höndum af og til, en hann reynir samt að sleppa því og bendir oft bara á þær. 3 hilla, sem hann nær næstum ekki í, 2 bækur og smá stórt skraut sem ekki brotnar ef barnið nær í það ( sem hann hefur gert af og til auðvitað )

Óbarnvæna innanhústrend 3: Púðar á sófum, ég á stóran gráan sófa með 9 púðum. Þessir púðar eru ekki á þeim stað sem ég vil hafa þá á daginn, og eiginlega ekki á kvöldin heldur þar sem ég á kærasta sem hendir 3 púðum alltaf út í horn. En litla mínum finnst gaman að henda öllum púðum á gólfið og er nett sama að mamman vill hafa þá í réttri litaröð og á réttum stað í sófanum. Ég fæ að hafa þetta eins og ég vil þegar ég er ein sum kvöld og á daginn þegar fjölskyldan er í leikskóla/vinnu. Fæ ekki að njóta af því að þetta líti svona vel út, en get huggað mig á því í vinnunni að íbúðin mín er fín..sem stendur. Og er reyndar hætt að vera svona mikill fullkomunarsinni með þetta, en reyni samt að hafa þetta fínt þegar ég get.

Varðandi þessa mynd fyrir ofan má við bæta að það er flest allt þarna sem það er ekki möguleiki að hafa á borðunum hér heima, þessir litlu viðkvæmu vasar, KERTI! ó neiiiiiiii, GREINAR!! ÓÓÓóó neiiiii neiiii, enda hefur það verið uppáhaldið hans síðan hann var lítill að finna flottar greinar. En ég læt mig dreyma um þann dag sem ég fæ að skreyta sófa borðin aðeins meira. Grænt plastblóm í hvítum stórum vasa er það sem ég fæ að hafa núna þarna upp á.

Óbarnvæna innanhústrend 4: Standandi blóma/plöntuvasa hillur ( veit ekki alveg hvað ég á að kalla þetta ) Þetta væri fyrir löngu búið að velta um koll eða mold út um allt á gólfum. Jú ég er með stóra plöntu á gólfinu en tróð gervifelds teppi ofan í „vasann“ svo barnið mitt kæmist ekki í moldina. Það hefur virkað mjög vel og lítur vel út.

En er búin að kaupa minni gerð af vasa, mjög líkur þessum  á myndinni, sem stendur lengst uppi á skáp í öryggri fjarlægð.

Það er auðvitað hægt að hafa mjög fínt heima sér með börn og hægt er að hugsa út fyrir kassann og innrétta heimilið eftir því hvað hentar best fyrir alla fjölskyldumeðlimi á hverjum tíma. Þótt ég geti ekki alveg verið með í þessum innanhústrendum hér að ofan, þá er ég frekar ánægð með heimilið eins og það er núna. Fullkomnunarsinninn kemur upp stökum sinnum og ég stundum tek til oft á dag til að halda fíneríinu við, en hef lært að leyfa mér að slaka á líka, klífa yfir púðana á gólfinu og líta framhjá draslinu. Enda ekki annað hægt að gera þegar maður á yndislegt barn sem hleypur til manns og við hendum okkur hlægjandi á púðana á gólfinu. Það er fullkomnun, ekkert annað 🙂 

Auður

Èg er einnig á Facebook. Endilega fylgið mér og mínum framtíðarbloggum þar!

 

TASSEL EYRNALOKKAR

Ég og tassel eyrnalokkar erum bestu vinir og  þar sem ég vinn í skartgripabúðinni SIX í Danmörku þá gríp ég allar tegundir af tassel eyrnalokkum sem koma inn. Þessir á myndinni eru mínir nýju uppáhaldseyrnalokkar og nota ég þá óspart. Myndin er því miður ekki í bestu gæðunum en vildi sem hafa hana með til að sýna ykkur dýrðina!

Hef í raun alltaf tengt þessa tegund eyrnalokka við það sem hékk niðri í gluggatjöldunum í gamla daga og á púðunum heima hjá ömmu og afa. En eins og fjaðraeyrnalokkarnir sem voru must have fyrir nokkrum árum þá eru þeir það sem mest er inni í dag. Ég elska þennan stíl og því stærri, því betri! Ég reyndar á mun minni útgáfu sem ég nota oft þegar ég er með hárið uppi og finnst það fallegt og hentar vel þá daga ég vil hafa það frekar einfalt og stílhreint. En þegar ég vil “ make a statement“ þá tek ég fram þá stærri gerðina og fíla mig í botn! Hér eru nokkrar tegundir sem eru á óskalistanum núna, ( búin að kaupa alla úr minni búð!) þeir fást í Gina tricot sem ég er svo heppin að hafa hér í Svíþjóð þar sem ég bý.

Ohhh svo fallegt!!! og fer öllum vel! Mæli með að fjárfesta í svona lokkum og ekki vera hrædd við að missa þig í smá litadýrð til dæmis rauðir, bláir, bleikir þetta virkar allt saman og kemur svo vel út. Enjoy!

Auður

Èg er einnig á Facebook. Endilega fylgið mér og mínum framtíðarbloggum þar!

 

 

Púðurbleikt í HM HOME

Hef alltaf verið hrifin af pastellitum og veit að ég verð ekki sú eina sem fell fyrir þessum púðurbleika lit sem er allsráðandi í nýjustu innréttingarvörum H&M Home. Læt myndirnar tala sínu máli og veita ykkur innblástur fyrir heimilið! Allar myndirnar eru fengnar af síðu H&M

Auður

Èg er einnig á Facebook. Endilega fylgið mér og mínum framtíðarbloggum þar!

 

Hamingjan finnst ekki á Facebook.

Nei, hamingjan finnst ekki á facebook en það er alltaf gaman að kíkja. En ef þú kannst við þetta : Þú ert á facebook eða inni á öðrum samfélagsmiðli og ert búin að vera að skrolla í all langa stund og ákveður að leggja frá þér símann. Einungis nokkrum mínútum eftir ertu kominn með símann aftur upp í hendurnar og ert komin aftur á sömu síðuna, skrollandi leitandi að einhverju nýju þér til afþreyingar. Þá er þetta ekki lengur afþreying heldur orðið að fíkn og þá er tími til að leggja frá sér símann eða tölvuna, alveg frá sér og setja sér mörk. Við setjum tölvu/síma tímatakmörk á börnin okkar þar sem það er betra fyrir þau, afhverju gerum við það ekki við okkur sjálf?

Það er okkur líka hollt að komast út úr þessum vítahring samfélagsmiðlanna, þar sem við erum sum fyrir löngu hætt að njóta og erum bara skrollandi með slökkt á huganum. Einnig eru margir á þeim stað að like-in veitir þeim skammvina hamingju sem fólk leitar þá alltaf meira og meira í. Hve mörg like fæ ég í dag, fyrir þessa mynd og með því erum við farin að meta okkur sjálf að verðleikum eftir like-um, kommentum, fylgjendum og öllu sem þessu fylgir. Lifa inni í gerviheimi sem er ekki að gera neinum greiða.

Síðustu vikur hef ég verið að fara í gengum mína notkun á samfélgasmiðlum og hve oft ég var að athuga símann minn yfir daginn ( í gegnum sérstakt app )og ég fékk sjokk. Einn daginn þá var ég 3 tíma á facebook og var í símanum í alls 5 og hálfan tíma! og ég chjékkaði á símanum mínum 97 sinnum yfir daginn! Eftir þetta ákvað ég að nú væri komið nóg, ég ætlaði ekki að vera þræll símans míns og allra samfélagsmiðlana. Ég ákvað að reyna að athuga símann minn max 10 sinnum yfir daginn og reyna að eyða minna en eða í kringum klukkustund á samfélagsmiðlum. Þetta gekk ágætlega þótt það hafi komið dagar inn á milli þar sem ég festist aðeins.

Ég er hætt að athuga símann strax og ég vakna og borða ekki morgunmatinn með símann í höndinni. Frekar les ég blöð eða jafnvel bækur, stundum hef ég ekki neitt og það er ótrúlegt hve morgunmaturinn smakkast allt í einu miklu betur en áður og ég nýt hans betur. Það er vegna þess að athyglin er öll á matnum, meikar sens ekki satt? Fann ég einnig að ég var farin að veita umhverfi mínu meiri athygli og bara það að horfa út um gluggann og uppgötva nýja hluti í kringum mig fékk mig til að líða betur. Ég var farin að gleyma hvar ég lét símann minn ( í jólafríinu ) og mér var alveg sama, þurfti ekki á honum að halda. Í stað þess að hanga í símanum, naut ég þess að lesa, tala við fjölskylduna, leika við litla strákinn minn eða bara eitthvað annað sem veitti mér mun meiri hamingju og minningar en það að skoða samfélagsmiðlana. Eftir þennan tíma fannst mér ég vera skýrari í kollinum og hugsanirnar jákvæðari…plús ekki með hugann á Facebook.

Hafið þið lent í því að vera í partýi, fjölskylduboði eða bara að vera með ykkar nánustu og allir eru í símanum?? þið hafið jafnvel ekki talast við í langan tíma en einhvern veginn festast allir í símanum. Þetta er þróunin í dag og þetta er sorgleg þróun, sjáum börn jafnt sem fullorðna með síma og spjaldtölvur fasta við andlitið í staðinn fyrir að njóta þess sem er að gerast fyrir framan þau. Þekkjum þetta vel á okkar heimili á kvöldin þar sem ég er á einum enda sófans með tölvuna að horfa á netflix og kærastinn minn á hinum endanum í tölvunni sinni. En no more! læt þetta ekki verða að mínum veruleika lengur og vona að þið hin íhugið að leggja sjálfum ykkur mörk sem og öðrum yngri meðlimum ykkar fjölskyldu.

En málið er að ég vil alls alls ekki hætta á samfélagsmiðlum allaveganna ekki eins og staðan er í dag. Ég elska að geta fylgst með stóru ættinni minni, vinum og kunningjum á facebook, sjá fallegar myndir á Instagram, skemmtileg snöpp á Snapchat og lesa og fá innblástur af allskonar bloggum. Þetta er líka orðinn partur af lífinu, like it or not, en það er hægt að njóta þessara miðla svo miklu meira en gegnum það að vera háð því að skoða þá á 5 mínútna fresti. Ef við skoðum þetta í rólegheitunum vitandi að við ætlum ekki að lesa og skoða lengur en í ákveðinn tíma og mögulega ekki aftur þann daginn, þá skoðum við miðlana kannski með meiri sjálfsvitund og njótum meira af þeim. Því miðlarnir eru náttúrulega einungis afþreying sem eiga að gleðja, hjálpa, veita innblástur eða meiri þekkingu á ákveðnum hlutum, sem fréttaveita eða bara hvað sem þið eruð að leita eftir. Ef við setjum inn status eða mynd, fyrir okkur sjálf, þar sem okkur finnst gaman að deila fallegum myndum eða skemmtilegt að skrifa statusa og deila með okkur hugsunum okkar án þess að like-in skipti okkur mál, getur verið að þetta verði allt miklu ánægjulegra.

Mörkin mín verða um klukkutími á dag, 15 mín facebook, 15 mín milli Instagram, Snapchat, Pinterest, síðan 30 mín í að lesa blogg og aðra miðla, fréttir og hvað sem mér dettur í hug. Þegar ég er sjálf að gera blogg, fæ ég meiri tíma þar sem það er mitt áhugamál og ég nýt þess að skrifa. Vona ég að þið hafið ánægju af mínum skrifum líka 🙂

Ef ég ætla að horfa á  kvikmynd eða þætti, legg ég í það 1 og hálfan til 2 tíma á kvöldi en þá minnka ég notkun mína á samfélagsmiðlum þann daginn. Og helst gera það kvöldið að bíókvöldi þar sem ég og kærastinn getum horft á eitthvað saman í stað þess að vera alltaf sitthvorum megin á sófanum. Það yrði frábært ef tíminn á hverjum miðli myndi minnka enn meira en svo lengi sem ég finn að ég er að njóta af því sem ég er að skoða og lesa, fá hugmyndir og líða vel eftirá þá er þetta fínn tími tel ég. Veit að það mun taka átak að breyta kvöld rútínunni okkar en ef okkur tekst að til dæmis gera eitthvað saman 1-3 kvöld vikunnar og í staðinn fyrir að hanga í tölvunni þá tel ég það vera stórt skref framávið og það er það sem ég er að leita eftir, ekki standa í stað í óhollum ávana heldur vinna í því að byggja upp betri venjur. Setja sér mörk í netnotkun til að geta notið lífsins betur og einnig samfélagsmiðlanna.

Auður

 

Lykilflíkur í fataskápinn

Hef verið að unna mér að kaupa eina og eina flík upp á síðkastið og hef ég lagt áherslu á að finna það sem er Must have í fataskápinn. Eitthvað sem lífgar upp á það sem ég þegar á og get gert mismunandi outfit af. Fann nokkrar lykilflíkur sem ég ætla að deila með ykkur hér. Mikið af myndunum eru sjálfur í vinnunni, en það hlýtur að fyrirgefast, ekki satt 🙂

TEINÓTT!

Fór upphaflega að leita mér að teinóttum jakka, en þar sem ég fann engan spennandi þá endaði ég með teinóttar buxur og ég gæti ekki verið sáttari! Háar í mittið og fara vel með svarta blazerinum minum! Þær fást í H&M.

RAUTT

Ég var harðákveðin að finna mér eitthvað rautt og endaði á þessum gullfallegu rauðu buxum úr BIK BOK. Einnig háar í mittið og hafa frábært snið!

BLÚNDA

Á núna 3 boli með blúndu í, enda elska ég þennan stíl! Þetta er uppáhaldsbolurinn minn og get ég notað hann með hvaða buxum sem er. Hér er ég í gallabuxum og blazerjakkanum mínum ( LOFA að ég nota hann ekki á hverjum degi!! 😀 )

BLÓMALEGUR KIMÓNÓ

Hvað er betra en að vera í sumarlegum blóma kímónó í Desember! Það lífgar allaveganna upp á mig og mitt skap þegar ég er í honum, hef fengið mörg hrós frá kúnnunum um hann sem gleðja blómahjartað mitt.

Ánægð að allaveganna ein myndin er ekki sjálfa, stefni á fleiri outfit pósta með almennilegum myndum 🙂 Vona að einhver hafi fengið fatainnblástur af þessu bloggi.

Eigið frábæra daga framundan og munið að bara ein flík getur breytt fataskápnum heilmikið og nýju outfittin sett saman úr gömlu og nýju flíkunum!

Auður

Èg er einnig á Facebook. Endilega fylgið mér og mínum framtíðarbloggum þar!

 

Foreldralífið

Taka tvö: var búin að skrifa þetta blogg áður en því miður datt það út eftir að síðan datt niður í smá tíma eins og svo margar aðrar íslenskar síður. Mig langaði mjög mikið að hafa það með svo hér kemur það aftur í aðeins öðruvísi útgáfu:

Margt hefur breyst eftir að ég varð mamma og við parið urðum foreldrar! fyrir utan það augljósa að vera allt í einu komin með ábyrgð fyrir litlu lífi þá hefur margt annað breyst alveg heillmikið eins og við má búast. Hér eru nokkur atriði! Byrjum á fyrir og eftir myndum af okkur Tommy. Fyrsta: Fyrsta myndin sem við tókum af okkur eftir að við byrjuðum saman árið 2009. Seinni: Við litla fjölskyldan á fyrstu jólunum okkar öll saman 2016.

SKIPULAG!

Ég hef alltaf verið skipulögð í vinnu og skipti upp deginum eftir verkefnum en það hefur ekki verið mikið þannig skipulag heima við. Var venjulega bara go with the flow þegar heim var komið. Nú er allt skipulagt til hins ítrasta, þegar ég kem heim: Taka til það mesta á heimilinu og gera yfirborðshreinsun. Bara stutt 10 mín max, síðan leika með syni mínum honum Emil. Eftirá finn ég föt fyrir hann til að vera í daginn eftir á leikskólanum og tek til leikskólatöskuna hans. Þessi rútína gerir allt svo einfaldara daginn eftir og minnkar morgun stressið áður en við förum á leikskólann. Síðan er komið að næturrútínunni hans Emils : náttföt, góða nótt bók og velling/Peli, tannbursta og segja góða nótt við fiskana okkar, kisu og það foreldri sem ekki svæfir. Þegar hann er sofnaður þá er það að klára að elda, borða og þrífa síðan eldhúsið og setja í þvottavél! Í kringum kl 20, þá er hægt að slaka á! Er ánægð að hafa þessa rútínu sem mun auðvitað breytast eitthvað með tímanum, en þetta er eitthvað sem ég var alls ekki vön! En einhvern veginn er þetta betra svona. Fæ miklu meira gert heima áður en ég ákveð að vera löt upp í sófa.

MEISTARAKOKKAR!

Núna þegar Emil er að borða það sama og við borðum þá þurfum við að elda góðan og hollan mat flesta daga vikunnar. Við nenntum þessu alls ekki áður og það var mikið um skyndibitamat heima hjá okkur eftir vinnu, þrátt fyrir að vera oft salöt og svolleiðis á virkum dögum þá var þetta mjög dýr ávani og ekki mikil fjölbreyttni í matarræðinu! Nú neyðumst við til að vera duglegri og erum orðin meistarakokkar á stuttum tíma! ( eða allaveganna kokkar sem er stórt skref fyrir okkur ) Reyndar mest kærastinn minn sem eldar þar sem ég kem seint heim úr vinnu og er með Emil eins lengi og ég get áður en hann sofnar.  En við hjálpumst að oft og skiptumst á stundum. Þetta er þúsund sinnum betra fyrir fjárhaginn og matarræðið!!

LENGRI HELGAR!

Helgarnar byrja kl 6/7 á morgnanna. Þarf ég að segja meira 😉 Við reyndar skiptum upp tímanum fyrir hádegi og leyfum hvort öðru að sofa aðeins meira.  Tek vanalega fyrstu vaktina sem er kringum 2 tímar, en það er yndislegt að geta skriðið aftur upp í rúm í smá tíma og safna orku fyrir daginn. Eftir hádegi förum við síðan vanalega í klukkutíma göngutúr þar sem Emil sefur í vagninum, þessir göngutúrar eru ómetanlegir og ég er alltaf full orku eftirá. Þegar hann vaknar þá reynum við að fara út að gera eitthvað öll saman eða bara hafa það kósý heima. Allur dagurinn er notaður og finn meiri vellíðan og ró þegar ég vakna á mánudagsmorgnum þar sem helgin var svo góð. Þetta er allt öðruvísi en þetta var hjá okkur!! Helgarnar fóru oft í að flytja sig frá rúminu yfir í sófann, þar sem var legið í leti allan daginn með tilheyrandi sjónvarpsglápi og háma í sig óhollustu. Þetta fór ekki vel með mann og ég var oft þreyttari á mánudögum eftir helgina en annars. Það er til eitthvað sem heitir of mikil hvíld eða einfaldlega að letin sé að drepa mann. Þessar helgar voru oft með djammi á næturnar, stundum föstudag og laugardag, mjög skemmtilegt en dagarnir eftir voru það ekki. Ekki miskilja mig hér, ég dett oft í nostalgíu yfir þessum helgum og stundum myndi ég gera allt fyrir að geta orðið sófakartafla aftur í einn dag eða geta djammað eins og vitleysingur án þess að hugsa um daginn eftir. En þetta er bara svo miklu betra núna, þetta líf var frábært en lífið núna er enn betra. Fer enn á djammið af og til og dansa eins og kreisípersóna en það er allt planað svo dagurinn eftir geti virkað fyrir okkur báða foreldrana. Lengri og betri helgar sem foreldrar!

Foreldralífið er sem sagt að fara mjög vel með okkur og njótum við hverrar mínútu!

Auður

Èg er einnig á Facebook. Endilega fylgið mér og mínum framtíðarbloggum þar!

 

Snoðaði sig fyrir málstaðinn!

Það er búið að vera ótrúlegt ævintýri hjá henni vinkonu minni Alexöndru Sif síðastliðnar vikur. Það byrjaði allt með einum status á facebook þar sem hún lýsti yfir því að hún ætlaði að byrja söfnun fyrir utmeda.is sem er samstarfsverkefni Rauða krossins og Geðhjálpar, en það er síða þar sem fólk með sjálfskaða og sjálfsvígshugsanir geta leitað sér hjálpar. Þessa söfnun byrjaði hún á vegna hennar eigin reynslu á sjálfsvígshugsunum og atviki sem hafði mikil áhrif á hana. Sem ég fjallaði meira um í bloggi mínu: Útmeða!

Hún sem sagt ætlaði að safna 300.000 þúsund krónum fyrir 16 Október, og ef henni myndi takast það þá myndi hún snoða sig og gefa hárið til Alopecia samtaka fyrir börn með sjálfsofnæmissjúkdóm sem veldur því að einstaklingar missa allt hárið.

Fékk hún rosalega góð viðbrögð við þessari söfnun og viti menn, hún náði markmið sínu fyrir nokkrum dögum! Í dag stendur reikningurinn í tæpum 360 þúsund og söfnunin er enn í gangi fyrir þá sem vilja enn láta gott af sér leiða.

Reikningsnúmer : 0130-05-063080
Kennitala: 021089-2069
Kass númer: 6625892

Hún stóð við loforðið og snoðaði sig, með fylgdi lítil vinkona hennar Snædís sem er með Alopecia og fylgdist spennt með hárinu fjúka af!

Tók smá viðtal við hana Alexöndru í tilefni þess að hárið fékk að fjúka fyrir málstaðinn:

Hvernig líst þér á nýja lookið? Mér finnst þú vera algjörlega að púlla þetta! Var erfitt að sjá lokkana hverfa?

Mér líst ótrúlega vel á þetta! Er eiginlega bara ennþá í sjokki en eins og er þá er ég mjög sátt við útkomuna. Varðandi að sjá lokkana fara þá voru þetta svo skrítnar aðstæður með myndavélar frá mismunandi miðlum og það að vera í miðju viðtali olli því að ég kannski náði ekki almennilega að spá í þessu fyrr en eftir á. Mér fannst skrítið að halda allt í einu á öllu hárinu mínu í poka, verð að viðurkenna það 🙂

Komu þér á óvart þessu gífarlegu viðbrögð sem þú fékkst á söfnuninni?

Já það kom vissulega á óvart, og einnig viðbrögðin sem ég fékk þegar ég rakaði af mér hárið. Mér finnst samt mikilvægt að fólk sjái af hverju ég var að gera þetta. Þetta snýst ekki bara um hárið heldur það að opna sig um sína andlegu vanlíðan og leita sér hjálpar.

Það var aðdáunarvert hve opin þú varst um þínar eigin sjálfsskaða hugsarnir á Snapchat. Hvernig tóku fylgjendur þínir þessu öllu?

Ég var ótrúlega hræðdd um að fá slæm viðbrögð en hingað til hef ég einungis fengið góð viðbrögð, og miklu meiri en ég þorði að vona. Það er ég ótrúlega þakklát fyrir! Ég hef heyrt frá fólki sem ég þekki og frá ókunnugum. Mest í gegnum snapchat en líka í gegnum Facebook og Instagram.

Hvernig er líðanin eftir alla þessa athygli síðustu vikur? Ertu ekki stolt af að hafa náð söfnunarmarkmiði þínu og aukið umfjöllun á geðheilsu?

Ég er held ég enn í smá sjokki. Í gær fékk ég algjört spennufall og veit að ég þarf að passa vel upp á mig næstu daga og vikur. Ég er virkilega ánægð að sjá að þetta fær fólk til að hugsa og að ég sé búin að ná að safna fyrir útmeð’a sem er svo verðugt málefni! Í samfélaginu í dag er svo mikið um neikvæða umfjöllun um úrræði fyrir fólk með geðheilbrigðisvandamál og sú umræða á alveg rétt á sér. Ég vildi því koma með það jákvæða fram og sýna að það eru til úrræði og það að þrátt fyrir að vera með kvíða og þunglyndi þá eru til aðferðir og úrræði í boði. Það er hægt að komast upp úr vanlíðan með ýmsum leiðum og fyrsta skrefið í átt að bata er að opna sig og tala um vanlíðanina. ÚTMEÐA! Þannig var það algjörlega hjá mér, ég var í mikilli afneitun og þurfti að viðurkenna þetta fyrir sjálfri mér og síðan öðrum.

Finnst svo frábær þessi setning hjá þér: ekki skammast þín fyrir að líða illa! Viltu fara aðeins nánar í hana?

Það líður öllum illa einhvern tímann. Það er eðlilegt en það er alveg ótrúlega mikið taboo. Ef þér líður aldrei illa veistu ekki hvað það er að vera hamingjusamur. En það er ekki eðlilegt ástand að vera í þunglyndi og jafnvel að skaða sjálfan sig og kannski á endanum taka sitt eigið líf. Við megum þó ekki skammast okkur fyrir þessar tilfinningar og vanlíðan. Það er ekkert til að skammast sín fyrir! Við þurfum að geta rætt um það ef okkur líður illa og fá viðeigandi aðstoð.

Viltu koma einhverju fleiru á framfæri sem þú hefur kannski ekki haft tækifæri á að segja:

Mig langar að koma fram á þeirri mikilvægu tengingu sem er á milli andlegrar og líkamlegrar heilsu. Hreyfing er mjög mikilvægur þáttur sem hægt er að nota í baráttunni við þunglyndi og kvíða. Einnig langaði mig að koma til fólks að ekki vera hrætt við að láta vaða í lífinu. Við eigum bara eitt líf og einn líkama, stökktu á það, tækifærin bíða þín fyrir utan þægindarammann.

 

Óska Alexöndru innilega til hamingju með þennan frábæra árangur, tökum hana á orðinu og skömmumst okkur ekki fyrir það ef okkur líður illa, leitum hjálpar og finnum hamingjuna aftur. Mæli með að fylgja henni á snapchat: Lexaheilsa.

Auður

Èg er einnig á ??Facebook. Endilega fylgið mér og mínum framtíðarbloggum þar!

 

Hvernig mömmugallabuxurnar urðu vinsælar aftur!

Byrjum á byrjuninni, gallabuxur voru fyrst gerðar fyrir kúreka og námuverkamenn árið 1853 af þýska innflytjandanum Levi Strauss í Ameríku. Það var ekki fyrr en James Dean klæddist gallabuxum í kvikmyndinni Rebel without a cause, 1955, að gallabuxur urðu fáránlega vinsælar. Gallabuxur urðu tákn uppreisnar gegn foreldrum og yfirvaldinu, og því keyptu ungt fólk þær í miklu magni. Það var ekkert meira töff en að vera í gallabuxum! Marilyn Monroe var síðan í gallabuxum í kvikmyndinni Misfits nokkrum árum seinna, gallabuxur voru orðnar jafnvinsælar fyrir konur og fyrir karlmenn.

 

Næsta áratuginn voru gallabuxurnar eitt stórt súper trend á markaðinum en það var ekki fyrr en með hippunum að þær fóru að þróast aðeins og á 70’áratuginum komu hiphuggers með flair ( útvíðar buxur, hátt mitti og þröngar að ofan ). Með punk rokk hljómsveitunum komu síðan enn önnur útgáfa af gallabuxum, þröngar og beinar. Þær leiddu til þess að á milli 80 og 90 komu peg leg gallabuxurnar sem urðu seinnameir það sem við þekkjum best í dag sem mömmu gallabuxur. Þessar buxur, með háu mitti og beinar niður, voru alls staðar á 90’ties tímabilinu! Þær voru aldeilis ekki mömmugallabuxur á þessum tíma, allir voru í þeim! Þar á meðal vinir okkar í Beverly hills 90210.

 

 

En gallabuxurnar héldu áfram að þróast og Alexander Macqueen kynnti til sögunnar ultra low rise gallabuxurnar og poppstjörnurnar elskuðu þær! Britney Spears, Christina Aguilara og Jennifer Lopez rokkuðu þær lengi vel. Árið 2003 voru buxurnar komnar svo langt niður á rassinn að fyrirbæri eins og “whale tail“ þar sem sést G-strenginn var aðal málið í og “muffin top“ var alvöru vandamál! Mikið hataði ég þessar buxur!

 

Tina Fey gerði síðan grínsketch fyrir Saturday night live þar sem hún kom með 90’ties gallabuxurnar tilbaka og nefndi þær mömmugallabuxur: Gefðu mömmu gjöf sem segir: Ég er ekki kona lengur, ég er mamma! Eldri kynslóð gallabuxanna var sem sagt eitthvað sem hægt var að gera stólpagrín af og var alveg fáranlegt að vera í. Þetta viðhorf var fast næsta áratuginn, ekki séns að láta sjá sig í mömmugallabuxum! Skinny jeans tóku síðan við af útvíðu ultra low rise og eru enn sterkar á markaðinum. Þær eru helst með hátt mitti eða rétt yfir mjaðminar, low rise voru og eru ekki lengur vinsælar ( thank god! ). Núna erum við að sjá útvíðar buxur koma sterkar inn aftur en vonandi sjáum við ekki low rise aftur!

Árið 2013 kom síðan konceptið frá fyrirtækinu K-hole: Normacore! Ef að reglan er að til að vera kúl þarf maður að vera öðruvísi, þá er það að klæða sig eins og normið er, einmitt það sem er erfiðast eða mest út úr kassanum, erfiðara en það að vera reyna að vera öðruvísi en allir aðrir. Þar sem tískan var einnig að byrja að fara í nostalgíu 90’ties áttina á þeim tíma þá var það mest töff að klæða sig eins og til dæmis foreldrar okkar klæddu sig í gamla daga. Mömmugallabuxurnar komu tilbaka! og núna voru þær töff. Stórt comeback hjá þessari týpu af buxum og byrjaði Top shop að selja þær aftur 2013. Í dag eru mömmubuxurnar eitt vinsælasta trendið og með sitt háa mitti og ofur þæginlega snið skil ég það mjög vel!

 

Allar upplýsingar á blogginu eru frá skemmtilegu myndbandi á Refinery29. Endilega kíkja á það! Heimildir: Refinery29

Auður

Èg er einnig á ??Facebook. Endilega fylgið mér og mínum framtíðarbloggum þar!

 

Út með það!

Sjálfsvíg, sjálfsvígshugsanir og hugsanir um að skaða okkur á einn eða annan hátt. Sumir láta verða af því, fremja sjálfsvíg og skilja eftir ættingja og vini sem vildu óska að þeir hefðu getað komið í veg fyrir hræðilega atburðinn. Oft vita aðstendendur ekki af þeim hugsunum sem eru að sjóða í hausnum á þeim sem enda með að fremja sjálfsmorð, þá er erfitt að reyna að hjálpa, manneskjan þjáist í þögn og án vitundar annarra.

Það er of mikið tabú um að tala um sjálfsvíg í dag, opnum fyrir umræðuna og út með það ef þér líður illa. Leitaðu hjálpar og segðu þeim nánustu þér frá því, bara það að tala um hugsanir þínar er ákveðinn léttir á sálinni og þið eruð í þessu saman. Það er svo mikilvægt að fá stuðning og hjálp.

Þegar ég var unglingur hugsaði ég mikið um sjálfsvíg og sjálfsskaða. Ég varð fyrir einelti í skólanum, var þunglynd og leið mjög illa. Þakka því hvað ég er mikil bjartsýnismanneskja að eðlisfari að ég er hérna í dag, vissi alltaf inni í mér að það biðu betri tímar. Á ég einnig góða að og þrátt fyrir að hafa ekki talað um það hvernig mér leið, fann ég stuðning frá þeim. Vildi samt að ég hefði talað við fjölskylduna um hvernig mér leið þar sem það var möguleiki á að breyta aðstæðum og fá hjálp. Í staðinn leið mér illa í mörg ár.

Við erum öll tengd þessu málefni á einn eða annan hátt, við þekkjum flest öll einhverja sem hafa verið í þessum aðstæðum, sem hafa íhugað sjálfvíg eða framið sjálfsvíg. Í kringum mig hafa verið of margir sem hafa talað um að vilja fremja sjálfsvíg, ein manneskja reyndi það fyrir framan mig, en það var í raun ákall á hjálp, þeirri manneskju líður betur í dag. Vinur minn framdi sjálfsvíg og skildi eftir sig ungan son.

Megin ástæðan fyrir því að ég skrifa þetta blogg er að ein af mínum bestu vinkonum, Alexandra Sif Herleifsdóttir Íþróttafræðingur, kom fram á snappinu sínu Lexaheilsa um daginn og sagði frá því að hún hafi íhugað sjálfsvíg þegar hún bjó með kærastanum sínum í Toronto 2016. Hún varð einnig fyrir einelti sem barn og fann fyrir sjálfsvígs hugsunum í fyrsta sinn þá en þessar sjálfsvígs hugsanir hafi komið upp aftur á þessum tíma vegna mikils álags. Hún hafi hugsað um að hoppa af svölunum heima hjá sér í Toronto, af 18 hæð í blokk, vegna mikils kvíða og þunglyndis, en hún vann í sínum málum og komst út úr þeim hugsunum til allra hamingju. En einstaklingur sem bjó einnig í húsinu lét verða af því og batt enda á líf sitt. Það hafi komið sem mikið áfall fyrir hana og vill hún nú koma á meiri umræðu um sjálfsvíg og sjálfsskaðahugsanir og með því vonandi hjálpa einhverjum.

Hún er því með söfnun í gangi fyrir udmeda.is sem er samvinnuverkefni Geðhjálpar og Rauða krossins fyrir fólk sem upplifir sjálfsskaða og sjálfsvígshugsanir. Ef hún safnar 300 hundruð þúsund krónum fyrir 16 október þá ætlar hún að raka af sér hárið og gefa Alpecia samtökum, en samtökin gera hárkollur fyrir börn með Alopecia, sjálfsofnæmissjúkdóm sem leiðir til þess að einstaklingar missa allt hárið.
 

Alexandra SIf
Alexandra Sif

Frábært framtak og mikið hugrekki að koma fram á almennum vettvangi og opna sig eins og hún hefur gert. Kom grein um hana í Stundinni núna í vikunni og mun hún einnig líklegast tala um málefnið í tveimur útvarpsviðtölum á næstunni. Mæli með því að fylgjast vel með!

 

Reikningsnúmer:

0130-05-063080

Kennitala:

021089-2069.

Margt smátt gerir eitt stórt og ég vona að sem flestir vilji styrkja þetta góða málefni og útmeða!

udmeda.is
Forsíða utmeda.is

 

Auður

Èg er einnig á ??Facebook. Endilega fylgið mér og mínum framtíðarbloggum þar!

 

 

 

Matarræðið og hamingjan!

Í mörg ár hef ég haft mikinn áhuga á að kanna tengslin milli þess sem við setjum í okkur og hvernig okkur líður og hvað við getum gert til að efla heilastarfsemina. Hef sjálf oft fundið fyrir góðum áhrifum þess af því að borða mjög hollt einn daginn (einnig með líkamsrækt) áhrifin voru sú að ég var full orku og jákvæðni daginn eftir. Auðvitað hef ég einnig fundið fyrir öfugu áhrifunum og orðið mjög leið og pirruð af röngu matarræði og of lítilli hreyfingu. Ég fór því í smá rannsóknarvinnu og gerði smá lista yfir það sem getur haft góð og slæm áhrif á okkur.

FISKUR OG HNETUR : UPPBYGGING OG VIÐHALD

Góða góða fitan! Ómega 3 og 6 er góða fitan sem þið getið fundið í fiski og hnetum. Hún er  mikilvæg fyrir uppbyggingu og að viðhalda heilbrigðum heilasellum. Endilega skella einnig í sig lýsi á morgnana, hollt og gott!

GRÆNMETI OG ÁVEXTIR: VÖRN OG FYRIRVÖRN

Við vitum öll hversu hollt það er að borða grænmeti og ávexti. En afhverju er það? Já þið giskið rétt! Vítamínin B6, B12 og fólínsýra hjálpa til að verja heilasellurnar og minnka hrörnun. Þessi vítamín eru öll saman í grænmeti og ávöxtum.

GÓÐU KOLVETNIN, SKAPIÐ OG ORKAN

Orkan sem við fáum frá kolvetnum með sterkju, sykri og trefjum þarf einnig að vera jöfn. Þegar við borðum til dæmis hvítt brauð fáum við hraða útlosun á glókósa í blóðið, orkan fer í topp en fellur síðan hratt niður með blóðsykursfalli. Skapið verður verra og við eigum erfitt með að einbeita okkur, hljómar þetta eins og eitthvað sem þið kannist við? Ég hef allaveganna oft lent í þessu og er náttúrulega eitthvað sem ég vil forðast. Hvernig gerum við það: jú við borðum flóknari kolvetni sem halda jafnvægi á blóðsykrinum, hafrar, korn og baunir viðhalda góða skapinu. Hafragrautur á morgnana er því alltaf góð hugmynd!

ÓHOLLI MATURINN: BORÐA Í ALGJÖRU LÁGMARKI

Á ég eitthvað að vera að fara í þetta? Vitum við þetta ekki öll…en viljum helst horfa framhjá því? Við vitum hvað er óhollt fyrir okkur en við borðum þetta samt. Ekki skrítið, þar sem mesti parturinn af þessum óholla mat gerir okkur glöð strax og við leitum í hann aftur og aftur til að viðhalda gleðinni ( sem að lokum getur leitt til að það þarf að borða mun stærri skammta til að fá sama gleðiboost! ) Vítahringur sem leiðir bara til óhamingju. 

SYKUR!

Nú er ég að tala um unninn sykur sem finnst í of mörgu nú til dags. Áhrifin sem sykurinn hefur á heilann er ekkert annað en ávanabindandi og næstum hægt að líkja við áhrifin sem eiturlyf hafa á fíkla.

Sykurfíklar…ég var ein af þeim, þar til ég fékk alveg nóg, var búin að borða svona stórt ílát af hlaupi ( sem hægt er að kaupa í flugvellinum ) frá föstudegi til sunnudags. Á sunnudagskvöldinu var ég að verða brjáluð, allt nammi búið en ég vildi meira! Ég vildi öskra ég var svo óhamingjusöm og pirruð, klukkan var 22 að kvöldi, myndi fara að sofa um miðnætti en mér var alveg sama, ég þurfti sykur! Og auðvitað reddaði ég mér, þarna sat ég í sófanum, með stafla af súkkulaði, draum og nammipoka og hámaði í mig fyrir framan sjónvarpið. Leið mér betur? Já í nokkrar mínútur, síðan kom magapínan, skapsveiflurnar urðu enn verri og mig minnir að ég grét mig til svefns þetta kvöld. Daginn eftir ákvað ég að svona vildi ég ekki lifa, nú skyldi ég hætta að borða nammi. Sem ég svo gerði, fyrir 10 árum, nokkur páskaegg hafa komið inn fyrir minn munn en ekki mikið meira en það. Fyrir 2 árum síðan sirka hætti ég alveg með sykur, engar kökur og kex lengur og var það ein besta ákvörðun lífs míns! ( fyrir utan að hætta að drekka áfengi ) get ekki lýst því hve góð áhrif þetta hefur haft á mig og get sagt ykkur að ég finn mikinn mun á mér. Sykurinn stjórnar mér ekki lengur, ég er við stjórnvölinn og líðanin er frábær! Auðvitað hef ég fallið fyrir freistingum en þær hafa í hvert skipti sýnt mér afhverju ég hætti, með magapínu og miklum skapsveiflum.

En nóg um það, hvaða áhrif hefur sykurinn á heilann, vísindalega séð: sykur leiðir til meiri sykurs, vegna verðlaunakerfis heilans. Heilinn gefur okkur verðlaun með útlosun dópamíns þegar við borðum sykur og því leitum við í meiri sykur, til að fá vellíðunartilfinninguna aftur. Eins og ég sagði hér að ofan, slæmur vítahringur sem leiðir til að við missum stjórnina, áhrifin af sykrinum verða minni ( því þurfum við meira ) og veldur miklum cravings. Tilfinningarnar fara upp og niður og líðanin er að hamingjan finnst bara í næsta bita af nammi. Sem er náttúrulega stuttlifuð hamingja.

TRANSFITA: ÓHOLLI SKYNDIBITAMATURINN

Transfita er óholl fita sem ætti að neyta í algjöru lágmarki. Sú fita finnst mikið í til dæmis í allskonar skyndibitafæðu. Leynist hún einnig í ýmiskonar bakkelsi og má nefna að kleinuhringirnir góðu eru fullir af transfitu. Hún hækkar kólesterol, tengist offitu og hefur verið nefnd í sambandi við slæmt minni. Einfaldlega ekki málið fyrir líkamann okkar.

 

Þetta er einfalt: borða holla, næringarríka og fjölbreytta fæðu og bara sætindi og skyndibitamat inn á milli. Heilinn ykkar mun þakka ykkur með því að halda skapinu í jafnvægi og orkunni uppi! Fæða úr góðu fæðuflokkunum sem ég nefni hér að ofan hjálpar til við að halda jafnvægi í útlosun seratóni, dópamíni og norepinephrine í heilanum og það þýðir minni skapsveiflur!

Hafið þið ekki einnig tekið eftir því þegar þið borðið einhæfan mat að þið einfaldlega verðið leið á matnum ykkar? Ástæðan er ekki bara sú að ykkur finnst komið með nóg af þessu, heldur verður útlosun dópamíns minni og minni fyrir hvert skipti sem við borðum sama matinn aftur og aftur, marga daga í röð. Meikar sens! Þetta gerist ekki með sykur, og því getum við borðað endalaust mikið af sætindum.

Allt sem við ákveðum að setja í okkur hefur áhrif á okkur, andlega og líkamlega. Er leiðin að hamingjunni í gegnum betra matarræði? Ég ætla allaveganna að láta á það reyna, hvað með ykkur?

Mæli með að kíkja á þetta á Youtube: Mínar heimildir:

How the food you eat affects your brain: TED-Ed

How sugar affects the brain: TED-Ed

What are trans fats and why are they bad

Auður

Èg er einnig á ??Facebook. Endilega fylgið mér og mínum framtíðarbloggum þar!

 

Fylgdu okkur á


Follow